హైదరాబాద్: బ్యాంకు ఖాతాదారులకు ముఖ్య గమనిక. ఈ వారం చివర్లో బ్యాంకింగ్ సేవలకు అంతరాయం కలిగే అవకాశం ఉంది. సెప్టెంబర్ 11, 2026 శుక్రవారం దేశవ్యాప్త బ్యాంకు సమ్మె, ఆ తర్వాత సెప్టెంబర్ 12 రెండో శనివారం, సెప్టెంబర్ 13 ఆదివారం, తెలంగాణ, ఆంధ్రప్రదేశ్‌లో సెప్టెంబర్ 14న గణేష్ చతుర్థి సందర్భంగా సెలవుతో కలిపి బ్రాంచ్ సేవలు వరుసగా ప్రభావితమయ్యే అవకాశం. దీంతో బ్రాంచ్‌లో చేయాల్సిన అత్యవసర పనులు ఉన్న ఖాతాదారులు ముందుగానే ప్లాన్ చేసుకోవడం మంచిది.
సెప్టెంబర్ 11న బ్యాంకు సమ్మె ఎందుకు? – యునైటెడ్ ఫోరమ్ ఆఫ్ బ్యాంక్ యూనియన్స్ (UFBU) సెప్టెంబర్ 11న దేశవ్యాప్త సమ్మెకు పిలుపునిచ్చింది. బ్యాంకింగ్ రంగంలో వారానికి ఐదు రోజుల పని విధానం అమలు, పెర్ఫార్మెన్స్ లింక్డ్ ఇన్సెంటివ్ (PLI) విధానంపై పునఃపరిశీలనతో పాటు పలు పెండింగ్ డిమాండ్లపై యూనియన్లు ఈ సమ్మెకు పిలుపునిచ్చాయి.
State Bank Of India- SBI కి అందిన సమ్మె నోటీసులో సెప్టెంబర్ 11తో పాటు సెప్టెంబర్ 28, 29, 30 తేదీల్లో మరో మూడు రోజుల సమ్మె, అక్టోబర్ 26 నుంచి నిరవధిక సమ్మె ప్రతిపాదన కూడా ఉన్నట్లు బ్యాంకు వెల్లడించింది.
సెప్టెంబర్ 11 నుంచి 14 వరకు బ్యాంకింగ్ పరిస్థితి
వరుసగా వచ్చే సమ్మె, వారాంతపు సెలవులు, పండుగ కారణంగా కొన్ని ప్రాంతాల్లో బ్యాంకు బ్రాంచ్ సేవలకు అంతరాయం కలగవచ్చు.
SBI అధికారిక ప్రకటన ప్రకారం – UFBU సమ్మె కారణంగా బ్యాంకు కార్యకలాపాలపై ప్రభావం పడే అవకాశం ఉంది. అదే సమయంలో సమ్మె రోజుల్లో బ్రాంచ్‌లు, కార్యాలయాలు సాధారణంగా పనిచేసేలా అవసరమైన ఏర్పాట్లు చేస్తున్నట్లు State Bank Of India- SBI తెలిపింది. అయితే సమ్మె కారణంగా పనిపై ప్రభావం ఉండే అవకాశం కూడా ఉందని స్పష్టం చేసింది.
ఖాతాదారులు: Bank Holidays- బ్యాంకు సెలవుల కారణంగా బ్రాంచ్ సేవలు అందుబాటులో ఉండకపోవచ్చు. అందువల్ల నగదు విత్‌డ్రా చేయడం, డిపాజిట్ చేయడం, చెక్కులు సమర్పించడం, KYC వివరాలు అప్‌డేట్ చేయడం లేదా లోన్‌కు సంబంధించిన పత్రాలు సమర్పించేందుకు బ్రాంచ్‌కు వెళ్లాల్సి ఉంటే.. సెలవులు ప్రారంభమయ్యేలోపు ఆ పనులను పూర్తి చేసుకోవడం మంచిది.
బ్రాంచ్‌లు మూసి ఉన్నప్పటికీ ఆన్‌లైన్ బ్యాంకింగ్, మొబైల్ బ్యాంకింగ్, UPI వంటి డిజిటల్ చెల్లింపు మార్గాలు సాధారణంగా అందుబాటులో ఉంటాయి. అయితే ఏదైనా అత్యవసర లావాదేవీ ఉంటే సంబంధిత బ్యాంకు యాప్ లేదా అధికారిక ఛానల్‌లో సేవ అందుబాటులో ఉందో ముందుగానే పరిశీలించడం మంచిది.
అదేవిధంగా ATMలు, ఇతర డిజిటల్ బ్యాంకింగ్ సేవలను వినియోగించుకోవచ్చు. అయితే సమ్మె లేదా సెలవు ఉందనే కారణంతో ATMల్లో తప్పనిసరిగా నగదు కొరత ఏర్పడుతుందని చెప్పడానికి ఆధారం లేదు. కాబట్టి ఈ విషయాన్ని ఖాతాదారులు భయపడాల్సిన అవసరం లేదు.
SBI ప్రకారం సమ్మె రోజున బ్యాంకు కార్యకలాపాలపై ప్రభావం పడే అవకాశం ఉంది. అయితే అన్ని శాఖలు పూర్తిగా మూసివేయబడతాయని బ్యాంకు పేర్కొనలేదు. వాస్తవ పరిస్థితి సమ్మె ప్రభావం, ఆయా ప్రాంతాల్లోని స్థానిక బ్యాంకు సెలవుల క్యాలెండర్ ఆధారంగా మారవచ్చు.
కాబట్టి బ్యాంకులో ముఖ్యమైన పని ఉన్న ఖాతాదారులు సెప్టెంబర్ 11 నుంచి 14 మధ్య తేదీలను దృష్టిలో పెట్టుకుని తమ లావాదేవీలను ముందుగానే ప్లాన్ చేసుకోవడం మంచిది.
ఈ కథనంలోని బ్యాంకు సెలవులు, సమ్మె, బ్యాంకింగ్ సేవలకు సంబంధించిన సమాచారం అందుబాటులో ఉన్న అధికారిక/పబ్లిక్ సమాచారాన్ని ఆధారంగా అందించబడింది. స్థానిక సెలవులు, సమ్మె ప్రభావం, బ్యాంకు శాఖల పనితీరు మారవచ్చు. ఖాతాదారులు ముఖ్యమైన లావాదేవీలకు ముందు సంబంధిత బ్యాంకు అధికారిక ప్రకటనను ఒకసారి పరిశీలించండి.
Comments
No comments yet. Be the first to comment.